Pengalaman Di Wad Hospital

cerita ini saya ambil dari http://brunei.fm/modeseram/2010/12/26/pengalaman-di-wad-hospital-by-julia-ana/
 dan juga pernah saya share on my other wordpress blog:- http://iniadalahaku.wordpress.com/2012/01/30/pengalaman-di-wad-hospital/

Apa yang aku tuliskan ini berdasarkan cerita dari mama aku sendiri

****************************************
aku: “ma… apa tu ceta kita dulu taim beranakkan c rose (bns) kan ku share pat fb aaa…yang pat mode seram aah, siuk bisdurang disana bkungsi ceta antu aaa.. “

Mama: “au… ceta atu….” Senyum-senyum

aku: “ingat-ingat lupa ku… “ (memaraki sigup)

mama: “ batah bah taim atu mama kana tahan…… . . . . . . . . . . .

Awal bulan September,1986

Alhamdullilah syukur,lahir kedunia jua anak mama yang ke-lima.. kiut walaupun mata sipit sebalah… ehehehe… Jadinya kana tempatkan tah mama ni diwad 6.. dalam 3 hari mama bertahan… kana gtau tah oleh nurse disana..mama pksa dpindahkan ke wad 5 (bilik first class bukan cam urang kebanyakan cakap..wad 5 ni wad gila) sebab wad 6 panuh.. ada lah jiran sebalah katil mama ni.. ketawa-ketawa bila tau mama kan kana pindahkan. “yah… bye-bye yah… bisai-bisai ahh”.
Mama yang inda tau apa-apa ni ganya mampu tekidum-kidum.Belalih tah mama ni ke wad 5. Diliatnya satu bilik ni ada dua katil. So mama ni kira sanang hati lah.. inda brbayar..

Malam pertama hari ke 3 di wad 5

Nurse kedua: “bilik sini kita masuk….”

Nurse: “eh.. bilik sebalah ani saja.. jangan tah lai bilik ani.. inda bisai bilik ani.. berangit tu…” sambilnya menjaling nurse kedua ani..

mama ok saja… ganya rose ani dari mula masuk inda beranti menangis.. kelurusan tah lagi si rose ani tekana penyakit kuning, pasal atu tah jua mama paksa bertahan lama dihospital atu.. disimpan dtempat katil baby belampung menangis.. tapi bila mama memingang sanyam tia. Disimpan balik menangis.. (kata mama taim tu bukan sama macam karang ani… karang ani bisai.. masuk ja dalam kaca tu… ani apa jua kai lampung kana khas kan.. katil pat katil baby atu saja)

nurse: “inda mau beranti menangis baby tu kakak?”

Mama: “au…nada yam au beranti menangis “

Nurse: “ bah biar tia kita simpan siring kita tu kak…tuk malam ani saja… kecian jua baby”

Jadinya mama ampai tah rose ni siring mama…

Malam atu rose inda mau langsung menyusu… menangis tah ganya sampai kesubuh dalam pukul 4 miatu. Jangan katakan rose saja inda mau tidur.. mama pun turut inda bertidur…

“nada mama bertidur… tarasa banar katil mama ani kana inggut… bgagar… Allah ganya tahu perasaan mama.. “ pendangaran mama bunyi rantai basi kana irit…. Tangis mama tu.. sudah inda bedangan selain si rose ganya dangan mama.. nurse pun nada jua melawat-lawat… sampai menyubuh dalam pukul 5 camtu baru tah sanyam..

aku: “mun aku ma… inda ku tahan… keluar ku kali mengunjar nurse minta dangani…”
mama: “inda lagi tpikir tu… mun sudah takut banar… kan membaca baru jua diri lapas beranak… bawa mengucap tah ganya….eeeeeeee mun mama tekanang bah . . . . . .” bekirik-kirik, giling-giling kepala..

Hari ke 4 – Petang

Rose dipindahkan semula ke wad 6. Jadinya tinggal lah mama saja di wad 5 ani.. atas arahan doktor ngan nurse… patang tu mama ni merehatkan tah mata.. luan mengantuk sal inda tidur semalaman… kunun siang ani nada tah gangguan….

TUUUUUBBBB!!!! Bunyi pintu bilik kana tutup kuat… mama tuleh.. asalnya mama ni tidur membelakangi pintu masuk… liatnya nada bejelama… becakap mama dalam hati “pembersih kali….” . mama inda berfikiran apa-apa… lagipun hari siang lakat bah… inda batah atu..alat berapa minit ganya..

TUUUBBBB!!! PAAAAPPPPPP!! PAAPPP PAAAPP!

Serantak bunyi dari pintu masuk sama pintu jamban.. teduduk tarus mama ani meliat… kakal jua nada urang… “Ya Allah.. Subhanallah… lindungiku Ya Allah…” . Inda batah tu masuk tah maci kan membersihkan jamban apa ni…

Mama: “bu… alum batah ani ada kita masuk?”

maci: “nada lai… napa lai?” bida pulang sudah usul mua maci atu… macam tau-tau ganya
Mama: “ah..inda ada pa-pa..betanya ganya”tarus tah mama ni keluar dari bilik atu.. menuju wad 6 menunggui si Rose.. walaupun tidur duduk..rela mama….

Hari ke 5 -

Masih jua mama ni bermalam dibilik atu.. mau inda mau terpaksa jua…. Sudah pun katil sebalahnya kusung.. nada berdangan… mama berdoa saja minta dilindungi… Sudah hari malam…alhamdullilah, tidur jua mama ahirnya.. walaupun kana kajuti oleh nurse tangah mlm… “inda ko papa lai? Saja ku melawat kau.. apa-apa panggil saja ku dluar ah.. ada kami tu menjagai kau”, mama ni melayan matanya mengantuk angguk-angguk ganya.

Paginya.. masuk tah nurse ni kebilik mama, berdua sama nurse lagi surang…

Nurse: “ nyaman tidur mu semalam lai… nada kana kacau apa?”

Mama: “Alhamdulillah..nada papa kita…”

Nurse: “inda jua, semalam tu susah ati kami… yatah ku gagas masuk takutku kau apa-apa…”

Mebuka cerita tah nurse ni membagitau kenapa kedia ni masuk bilik mama mengajut…. Ia ni sama kawannya duduk dkauter macam biasa… kauter durang ni kana tampatkan bukan dapan-dapan bilik..tapi diujung…

Nurse kedua: “subhanallah… eh jah, cuba kau liat tu….”dangan suaranya damit sambilnya mengamit kawannya ani..menyignal ngan mata.. menyuruh meliat…

Nuse pertama: “Ya Allah… subhanallah… baik tah ku menyubuk kedia… ya Allah.. mudahan tah ia inda papa…” laju tarus ya meninggalkan kawannya ani menuju bilik mama..

“karang malam..jangantah lagi kau tidur sini mun alum ada dangan… tidur saja kau lai pat wad 6 atu siring anakmu…”. Mama ni jadi tanda tanya apa yang durang liat semalam atu.. “napa kan nurse?”

Nurse: “semalam kami meliat ada masuk kebilik mu ani… Tuhan ganya tau takut kami semalam atu.. yang ku urikan kau… takut ku diapa-apanya kau… yang tah ku masuk kebilik mu, ku kajuti kau semalam tu”

Mama: “ada masuk kebilik???”

Nurse: “ au.. rambutnya panjang, perasaan ku smpai kelantai…putih banar ani.. megerabang… tunduk ganya jalannya.. muanya inda nampak.. baju nya beririt jua.. kukunya ani itammmm… panjang… mun bejalan ani kainny beririt tapi cam terabang ganya.. udah kami meliat kemana tujunya..rupanya kebilik mu ani.. yatah dalam takut-takut ku atu ku beranikan jua masuk kebilik mu.. baik jua nada papa lai.. ya Allah.. Allah atu jua mlindungi kau”

Mama ni terdiam… takut ada, uri ada, mikirkan lagi dirinya baru lapas beranak..kan menangis ada.. berbaur perasaan mama masa atu.. kan balik rasanya jam atu jua… bertanya tah lagi nurse ani… mama ada yasin apa, kalakati sama limau kapas dalam bilik atu… beristifar tarus mama.. langsung ia inda terkanang… dibagitaunya nada… giling-giling nurse ani.. ia pun katanya lupa kan bertanya pat mama… inda batah nurse tu keluar.. bapa pun datang.. alum lagi angat jubur bapa duduk..baru kan menyacah duduk, mama suruh tarus bawa kalakati, yassin sama limau kapas.. nada jua bapa ani banyak tanya.. tarus tah bapa mengambil kalakati, yassin sama limau kapas di rumah…
Mama: “laju kali bapa mu atu mendraib.. inda batah perasaan mama menunggu.. inda smpai setangah jam.. sama nini mu apa melawat mama…”

Hari ke 7

Sejak atu siang saja mama masuk bilik atu.. asal saja pukul 6 ptg, belalih tah mama ke wad 6.. semana-mana hari ke 7 tu, ada tia masuk surang lagi.. namanya lili (bns). Nyaman ni ati mama pasalnya bedangan tah ia jua dalam bilik atu.. inda pulang mama cerita apa-apa.. takutnya si lili ani inda mau sebilik sama mama…

Sudah malam, lapasnya cerita-cerita sama si lili ani.. kalat udah mata.. tidur tah bisdia ani. Dalam mama tidur atu… semana-mana mendangar mama bunyi urang menangis.. bukan lagi sayup-sayup… panuh bilik bah.. ruhung-ruhung lagi… rupanya si lili ani menangis…

Lili: “Ya Allah kak, rasaku kn membanguni kita ah.. terasi-terasi ku mengarik…sampai ku umbani pamper pat mua kita… nada kita sadar kak..” sidak-sidak.

Mama: “napa kau lili eh.. banar nada ku sadar li.. sadar ku bila ku mendangar kau menangis…”

Lili: “jangan kita tidur kak.. dangani ni…katil ku ahhh… kana angkat-angkat..”

BAAAAAPPP… PAPPPPP… melangur tarus pintu jamban ani.. nampak banar kana pemain.. mun sudah buka tutup buka tutup balik-balik..lagur-lagur…bisdurang ani inda lagi ingat kan manggil nurse kah apa… sama-sama tah mama sama si lili ani mbaca-baca.. nya mama..inda tah tau apa yang dibaca…lintang pukang bacaan… inda tah lagi kira kuar darah nipas, membaca surah tah apa sudah ni.. baik jua inda luan bepanjangan kana kacau.. aman jua ahirnya walaupun kata mama rasanya masa malam atu lama banar kan siang…

Hari terahir di wad 5 – hari ke 10

Lili, “kak…laju mandi kak.. ada abar baik ni kan ku gtau ka….”. mama taim atu dalam jamban.. apa lagi mama ni kakai-kakai tah jua keluar.. alum lagi keluar dari jamban… tarus si lili ani memaluk mama.. “abar baik kak… tani dua keluar ari ani kak.. ya Allah kak.. sanang hati kak…laju tah bepanyam…”. Jiwa pompuan tah jua banar aaa..sentimental.. dua-dua menangis ni, menangis sal luan iski kan mulih…

Waktu kan keluar tu.. sampat mama mengaga nurse kan mengucap terima kasih.. 7 hari mama di wad 5 atu … selama atu durang menjaga… kelurusan tah jua nurse ni bekeraja hari atu.. baru tah mbuka mulut bepadah pat mama… katanya.. bilik sebalah mama atu bagas cina mati..cina s’pore.. sal kenser rahim.. stat atu bilik sebalah atu macam-macam pendangaran durang… pasal atu tah jua ia inda menyuruh mama ni kana simpan dalam bilik atu.. alasannya ganya kan bepadah berangit walaupun inda masuk akal alasan atu.. lagi jua.. dibawah wad 5 atu… sebenarnya bilik mayat… (0_o”)


Wassalam…